অস্ত্ৰ কাৰখানাত ভয়ংকৰ বিস্ফোৰণ, নিহত ৮ জন

 

অস্ত্ৰ কাৰখানাত ভয়ংকৰ বিস্ফোৰণ, নিহত ৮ জন

নেচনেল ডেস্ক,২৪ জানুৱাৰীঃ নাগপুৰৰ সমীপৱৰ্তী অস্ত্ৰ কাৰখানা এটাত হোৱা ভয়ংকৰ বিস্ফোৰণত ৮ জন লোকৰ মৃত্যু হয়। ইয়াৰ উপৰিও আৰু ৭ জন লোক আহত হোৱা বুলি এনডিটিভিৰ প্ৰতিবেদনত প্ৰকাশ পাইছে। এই বিস্ফোৰণৰ তীব্ৰতা ইমানেই বেছি আছিল যে, ৫ কিলোমিটাৰ দূৰত্বৰ পৰাও শুনা গৈছিল।

এনডিটিভিৰ প্ৰতিবেদন অনুসৰি মহাৰাষ্ট্ৰৰ ভাণ্ডাৰা জিলাত সংঘটিত এই বিস্ফোৰণত হতাহত হোৱাৰ কথা কেন্দ্ৰীয় মন্ত্ৰী নীতিন গাডকাৰীয়ে এক অনুষ্ঠানত নিশ্চিত কৰে। ভুক্তভোগীক সন্মান জনাই এক মিনিটৰ বাবে মৌনতা অৱলম্বন কৰিবলৈ আহ্বান জনাই তেওঁ কয় যে, ‘ভাণ্ডাৰাৰ অস্ত্ৰ কাৰখানাত এক বৃহৎ দুৰ্ঘটনা সংঘটিত হয়, য’ত ৮ জন লোকৰ মৃত্যু হয় আৰু আন ৭ জন আহত হয়।

ইয়াৰ পূৰ্বে জিলা উপায়ুক্ত সঞ্জয় কলটে কাৰখানাটোৰ এল টি পি ছেকচনত পুৱা ১০:৩০ বজাত বিস্ফোৰণ সংঘটিত হোৱা বুলি জনাইছিল। পৰিস্থিতি নিয়ন্ত্ৰণ কৰিবলৈ অগ্নিনিৰ্বাপক বাহিনী আৰু চিকিৎসা কৰ্মী উপস্থিত হয়।

বিস্ফোৰণৰ ফলত চাল ভাঙি আবদ্ধ হৈ পৰে কেইবাজনো শ্ৰমিক। প্ৰাৰম্ভিক প্ৰচেষ্টাৰ ফলত তিনিজন লোকক জীৱিত অৱস্থাত উদ্ধাৰ কৰা হয় আৰু এজনক মৃত অৱস্থাত উদ্ধাৰ কৰা হয়। এগৰাকী জ্যেষ্ঠ বিষয়াই জনোৱা মতে, ধ্বংসাৱশেষ আঁতৰোৱাৰ বাবে এক্সকেভেটৰ ব্যৱহাৰ কৰা হৈছে।

বিস্ফোৰণৰ তীব্ৰতা ইমানেই আছিল যে, ইয়াৰ শব্দ ৫ কিলোমিটাৰ দূৰৰ পৰা শুনা গৈছিল । দূৰৰ পৰা বন্দী হোৱা এটা ভিডিঅ’ত কাৰখানাটোৰ পৰা ওলোৱা ডাঠ ধোঁৱা দেখা গৈছে।মুখ্যমন্ত্ৰী দেৱেন্দ্ৰ ফাড়নবিশে কয় যে বিস্ফোৰণস্থলীত শীৰ্ষ বিষয়াসকল আছে আৰু নাগপুৰৰ পৰা উদ্ধাৰকাৰী দল শীঘ্ৰে উপস্থিত হ’ব। প্ৰয়োজন হ’লে চিকিৎসাৰ দলটোও সহায় কৰিবলৈ সাজু হৈ আছে।

উৎস: এনডিটিভি

আগলৈ প্ৰেৰণ কৰক