পুনৰ উত্তপ্ত মণিপুৰ: ১ নিহত, ২৭ নিৰাপত্তাৰক্ষীসহ ৪৩ জন আহত

 পুনৰ উত্তপ্ত মণিপুৰ: ১ নিহত, ২৭ নিৰাপত্তাৰক্ষীসহ ৪৩ জন আহত

বি. চি ডেস্ক, ৯মাৰ্চঃ ইম্ফল আৰু পাহাৰীয়া জিলাৰ মাজত বাছ সেৱা পুনৰ আৰম্ভ কৰাৰ বিৰোধিতা কৰি কুকি-জো জনজাতীয় সংগঠনে প্ৰতিবাদ সাব্যস্ত কৰাৰ সময়তে বিভিন্ন জিলাত সংঘটিত হোৱা সংঘৰ্ষত এজন প্ৰতিবাদকাৰী নিহত হোৱাৰ বিপৰীতে ২৭ জন নিৰাপত্তাৰক্ষীসহ কমেও ৪৩ জন লোক আহত হয়।

কেন্দ্ৰীয় গৃহমন্ত্ৰী অমিত শ্বাহে মণিপুৰত মুক্ত চলাচল সুনিশ্চিত কৰিবলৈ দিয়া নিৰ্দেশৰ এসপ্তাহ পিছতে পুনৰ ৰাজ্যখনত হিংসাত্মক পৰিস্থিতিৰ সৃষ্টি হয়। মণিপুৰৰ কাংপকপি জিলাত প্ৰশাসনে ইম্ফলৰ পৰা কাংপকপি জিলা হৈ সেনাপতিলৈ আৰু ইম্ফলৰ পৰা বিষ্ণুপুৰ হৈ চুৰাচান্দপুৰলৈ বাছ সেৱা পুনৰ আৰম্ভ কৰাৰ পিছতে শনিবাৰে পুনৰ হিংসাত্মক পৰিস্থিতিৰ সৃষ্টি হয় বুলি সূত্ৰই প্ৰকাশ কৰিছে।

নিৰাপত্তা বাহিনী আৰু প্ৰতিবাদকাৰীৰ মাজত সংঘৰ্ষত এজন প্ৰতিবাদকাৰী নিহত হোৱাৰ বিপৰীতে ২৭ জন নিৰাপত্তাৰক্ষীসহ কমেও ৪৩ জন লোক আহত হয়। নিহত লোকজন লালগৌথাং চিংচিট বুলি চিনাক্ত কৰা হৈছে। আৰক্ষীয়ে জনোৱা মতে, কিথেলমেনবিত সংঘৰ্ষৰ সময়ত ৩০ বছৰীয়া চিংচিট গুলীবিদ্ধ হয় আৰু চিকিৎসালয়লৈ নিয়াৰ সময়তে তেওঁৰ মৃত্যু হয়।

কাংপকপিৰ একাংশ গাঁৱৰ স্বেচ্ছাসেৱকে লাঠি-শিলেৰে পথ অৱৰোধ কৰে। এখন বাছত অগ্নিসংযোগ কৰাৰ খবৰো পোৱা গৈছে, যাৰ ফলত স্থানীয় লোক আৰু আইন-শৃংখলা বজাই ৰাখিবলৈ নিয়োজিত নিৰাপত্তাৰক্ষীৰ মাজত সংঘৰ্ষৰ সৃষ্টি হয়। পৰিস্থিতি নিয়ন্ত্ৰণৰ বাবে নিৰাপত্তাৰক্ষীয়ে লাঠিচালনা কৰিব লগীয়া হোৱাত কেইবাজনো গাঁৱৰ স্বেচ্ছাসেৱক আহত হোৱা বুলি স্থানীয় ৰাইজে অভিযোগ কৰে।

স্থানীয় ৰাইজে সংঘৰ্ষৰ ভিডিঅ’ কৰি ছ’চিয়েল মিডিয়াত আপলোড কৰে। ভিডিঅ’বোৰত দেখা গৈছে যে কিছুমান বাছত অগ্নিসংযোগ কৰাৰ লগতে কাঠ-শিলেৰে পথ অৱৰোধ কৰা হৈছে। বৰ্তমানলৈ কোনো সংবাদ মাধ্যমে এই ভিডিঅ'ৰ সত্যতা নিশ্চিত কৰা নাই।

শুকুৰবাৰে মণিপুৰৰ মুখ্য সচিবে জাৰি কৰা এক বিবৃতিত মণিপুৰত ৮ মাৰ্চ শনিবাৰৰ পৰা বাছ সেৱা আৰম্ভ হ’ব বুলি ঘোষণা কৰে। কেন্দ্ৰীয় সশস্ত্ৰ আৰক্ষী বাহিনীয়ে বাছ সেৱালৈ নিৰাপত্তাৰক্ষীৰ এস্কৰ্টৰ ব্যৱস্থা কৰিব বুলিও উল্লেখ কৰা হয়। বাছসেৱা ইম্ফল-কাংপোকপি-সেনাপতি, সেনাপতি-কাংপোকপি-ইম্ফল, ইম্ফল-বিষ্ণুপুৰ-চুৰাচান্দপুৰ আৰু চুৰাচান্দপুৰ-বিষ্ণুপুৰ-ইম্ফল পথত চলাচল কৰিব। কোনোবাই এই সেৱাত বাধা সৃষ্টি কৰিলে কঠোৰ ব্যৱস্থা গ্ৰহণ কৰা হ’ব বুলিও সচিবগৰাকীয়ে সকীয়াই দিয়ে।

কেন্দ্ৰীয় গৃহমন্ত্ৰী অমিত শ্বাহে ১ মাৰ্চত মণিপুৰৰ নিৰাপত্তা পৰিস্থিতিৰ পৰ্যালোচনা কৰি ৰাজ্যৰ ৰাজপথত সকলোৰে মুক্ত চলাচল নিশ্চিত কৰিবলৈ নিৰাপত্তা বাহিনীক নিৰ্দেশ দিছিল। গৃহমন্ত্ৰীয়ে ৮ মাৰ্চৰ ভিতৰত পুনৰ মুক্ত চলাচল আৰম্ভ কৰিবলৈ নিৰ্দেশনা দিয়ে। ইয়াৰ পিছত প্ৰশাসনে মণিপুৰ ৰাজ্যিক পৰিবহণৰ (এম এছ টি) বাছসমূহ ডাঙৰ ডাঙৰ পথত চলাবলৈ আৰম্ভ কৰে।

এই ঘটনাৰ পাছত ৰাজ্য চৰকাৰ আৰু কেন্দ্ৰীয় চৰকাৰে সুৰক্ষা ব্যৱস্থা অধিক কঠোৰ কৰাৰ সিদ্ধান্ত লৈছে। অঞ্চলটোৰ মুখ্য স্থানসমূহত অতিৰিক্ত নিৰাপত্তা বাহিনী মোতায়েন কৰা হৈছে যাতে পুনৰ এনে হিংসাত্মক পৰিস্থিতিৰ সৃষ্টি নহয়। ৰাষ্ট্ৰীয় ঘাইপথৰ কিছুমান অংশত সিসিটিভি সংস্থাপন কৰাৰ লগতে সেনা আৰু অৰ্ধসামৰিক বাহিনীৰ অধিক চকী স্থাপন কৰিছে।

এই ঘটনাৰ পিচৰে পৰা স্থানীয় জনসাধাৰণৰ মাজত উদ্বেগ বৃদ্ধি পাইছে, বিশেষকৈ যাতায়াত ব্যৱস্থাৰ অবনতিৰ বাবে বহু লোক অসন্তুষ্ট। অঞ্চলটোৰ ৰাজনৈতিক নেতা আৰু সমাজৰ বিশিষ্ট ব্যক্তি সকলে সকলো পক্ষক শান্তি বজাই ৰাখিবলৈ আহ্বান জনাইছে। চৰকাৰে লগতে কয় যে মণিপুৰত শান্তি আৰু স্থায়িত্ব আনিবলৈ সকলো প্ৰয়াস চলোৱা হ'ব।

ইতিমধ্যে, স্থানীয় চৰকাৰ আৰু কেন্দ্ৰীয় বাহিনীৰ মাজত এক উচ্চস্তৰীয় বৈঠক অনুষ্ঠিত হৈছে, য’ত সামৰিক বাহিনী, আৰক্ষী অধীক্ষকসকল আৰু অন্যান্য উচ্চ পদস্থ বিষয়াসকল উপস্থিত থাকে। বৈঠকত সিদ্ধান্ত লোৱা হয় যে, অহা দিনবোৰত অধিক সেনা মোতায়েন কৰি সম্পূৰ্ণ এলেকাত কঠোৰ নিৰাপত্তাৰ ব্যৱস্থা কৰা হ'ব। প্রশাসনৰ তৰফৰ পৰা স্থানীয় ৰাইজক শান্তি বজাই ৰাখিবলৈ আহ্বান জনোৱা হৈছে, লগতে যিকোনো সন্দেহযুক্ত ঘটনাৰ খবৰ সঠিক সময়ত প্রশাসনক জনাবলৈ অনুৰোধ কৰা হৈছে।

আগলৈ প্ৰেৰণ কৰক