অস্ত্ৰ আমদানিত জেলেনস্কিৰ দেশ প্ৰথম স্থানত, তাৰ পিছতে ভাৰত! আন্তঃৰাষ্ট্ৰীয় প্ৰতিবেদনত প্ৰকাশ
উৱেভ ডেস্ক, ১০মাৰ্চঃ প্ৰধানমন্ত্ৰী নৰেন্দ্ৰ মোডীৰ ‘আত্মনিৰ্ভৰ ভাৰত’ আৰু ‘মেক ইন ইণ্ডিয়া’ শ্লোগানক সফল কৰাৰ স্বাৰ্থত প্ৰতিৰক্ষা মন্ত্ৰালয়ে বিগত কেইবছৰমানৰ পৰা বাৰে বাৰে অস্ত্ৰ-শস্ত্ৰ আৰু সামৰিক সামগ্ৰীৰ আমদানি কৰ্তন কৰিছে। কিন্তু আন্তঃৰাষ্ট্ৰীয় বাতৰি অনুসৰি ৰাছিয়াৰ সৈতে যুদ্ধত লিপ্ত হোৱা ইউক্ৰেইনে যোৱা চাৰি বছৰত যিমান অস্ত্ৰ আমদানি কৰিছে, সেয়া শান্তিত থকা ভাৰতে আমদানি কৰা অস্ত্ৰৰ ওচৰা ওচৰি!
ছুইডেনৰ প্ৰতিৰক্ষা সমীক্ষা সংস্থা ষ্টকহ’ম আন্তঃৰাষ্ট্ৰীয় শান্তি গৱেষণা প্ৰতিষ্ঠান (SIPRI)ৰ শেহতীয়া প্ৰতিবেদনত দেখা গৈছে যে ২০২০ চনৰ পৰা ২০২৪ চনৰ ভিতৰত বিশ্বৰ মুঠ অস্ত্ৰ ক্ৰয়ৰ ৮.৩ শতাংশ ভাৰতে ক্ৰয় কৰিছে। কিন্তু শতাংশ হিচাপত এই হাৰ পূৰ্বৰ চাৰি বছৰৰ তুলনাত কিছু কম। ২০১৫ চনৰ পৰা ২০১৯ চনৰ ভিতৰত বিশ্বৰ অস্ত্ৰ আমদানিৰ বজাৰত ভাৰতৰ ‘অৱদান’ আছিল ৯.৩ শতাংশ। আনহাতে, ২০২০-২৪ চনত ভ’ল’ডিমাইৰ জেলেনস্কিৰ দেশখনে ৮.৯ শতাংশ অস্ত্ৰ আমদানিৰে প্ৰথম স্থান লাভ কৰে।
ছিপ্ৰিৰ প্ৰতিবেদনত বিশ্বৰ ১৬২খন দেশৰ ভিতৰত কাটাৰ, চৌদি আৰব আৰু পাকিস্তানে তৃতীয়, চতুৰ্থ আৰু পঞ্চম স্থান লাভ কৰিছে। অৰ্থনৈতিক মন্দাৱস্থাৰ সময়তো পাকিস্তানৰ অস্ত্ৰ আমদানি হ্ৰাস পোৱা নাই। বিগত চাৰি বছৰত বিশ্বৰ মুঠ অস্ত্ৰ আমদানিৰ ৫.৩ শতাংশই তেওঁলোকৰ ভাগ আছিল। আনহাতে, নব্বৈৰ দশকৰ পিছত প্ৰথমবাৰৰ বাবে চীন বিশ্বৰ শীৰ্ষ ১০ খন অস্ত্ৰ আমদানিকাৰক দেশৰ ভিতৰত স্থান লাভ কৰা নাই। অৱশ্যে ছি জিনপিঙৰ দেশৰ প্ৰতিৰক্ষা বাজেট ক্ৰমাগতভাৱে বৃদ্ধি পাইছে। ইয়াৰ অৰ্থ হ’ল চীন সঁচাকৈয়ে প্ৰতিৰক্ষা উৎপাদনত ‘আত্মনিৰ্ভৰশীল’ হৈ পৰিছে।
ভাৰতক অস্ত্ৰ বিক্ৰীৰ ক্ষেত্ৰত এতিয়াও শীৰ্ষত আছে ৰাছিয়া। ২০২০-২৪ চনত প্ৰধানমন্ত্ৰী নৰেন্দ্ৰ মোডীৰ চৰকাৰে ক্ৰয় কৰা অস্ত্ৰ-শস্ত্ৰৰ ভিতৰত ৩৮ শতাংশ ভ্লাদিমিৰ পুটিনৰ দেশৰ পৰা আহিছিল। কিন্তু প্ৰতিৰক্ষা খণ্ডত নতুন দিল্লীৰ মস্কোৰ ওপৰত নিৰ্ভৰশীলতা ক্ৰমান্বয়ে কমি আহিছে। ২০১৫-১৯ বৰ্ষৰ পৰা ভাৰতৰ মুঠ অস্ত্ৰ ক্ৰয়ৰ ৫৫ শতাংশই ৰাছিয়াৰ পৰা আহিছিল। যোৱা চাৰি বছৰত ভাৰতে অস্ত্ৰ ৰপ্তানিত দ্বিতীয় ইজৰাইল (৩৪ শতাংশ) আৰু ফ্ৰান্স (২৮ শতাংশ) অস্ত্ৰ ৰপ্তানি কৰে। আনহাতে, ২০২০ চনৰ পৰা ২০২৪ চনলৈকে বিশ্বৰ পাঁচখন বৃহৎ অস্ত্ৰ ৰপ্তানিকাৰক দেশ হ’ল আমেৰিকা, ফ্ৰান্স, ৰাছিয়া, চীন, আৰু জাৰ্মানী।
0 coment rios: